بایرام اولدی، قالیر آمما هله بایرام گؤروشی

دو سوپور قاپ پاجانی تا گله بایرام گؤروشی

بیر گئده رسن گؤروشه، بیرده گلرلر گؤروشه

یازیلیب یازدا ایکی مرحله بایرام گؤروشی

 ره به ره شیرنی که آلدین، داشا آجیل ائوی ین 

جور به جور میوه ده، دورد-بئش سله بایرام گؤروشی

اوین هیرس آلماغینا خانه تکانی دئدیلر

دوزدی والله که اولوب زلزله بایرام گؤروشی

باخسان ائوده آیاق اوستونده هامی ویرنیخیری

ائولره گؤر نه سالیب ولوله بایرام گؤروشی

توواراق قیش دان اوزولموش یازا ساری قاچیریق

آمما یول اوسته  قوروبدور تله بایرام گؤروشی

چشم هم چشمیه خاطیر دوشوروک بورج ایچینه

چوخ یامان  بیزلری سالدی اله بایرام گؤروشی

تزه مبل آلسا باجیم بیزده گرک فوری آلاق

خانیمی گؤر نه سالیب کل- کله بایرام گؤروشی

من تک ایناسلارا بایرام دئیه سن یاسدی اینان

پولسوز اینسانی سالیر انگله بایرام گؤروشی...