اشعارده هی آختاریسان یار کوچه‌لردن!

حق قورتارا شاعیر، سنی بو دار کوچه‌لردن!

باخدی سنه، مات قالدی فریدونِ مشیری

او سویله‌مه‌دی بیر بئله اشعار کوچه‌لردن!

گز کوچه‌لری آمما گولوم، چیخما جیزیق‌دان

اوز وئرسه، داهی ایسته‌مه آستار کوچه‌لردن!

بیر ذرّه‌ده دور گئت خیاوانلاردا مانور وئر

مورد‌لری قارداشیم، آز آختار کوچه‌لردن!

سن آرخایین اول گئت ایشی‌ین، کبری خالا وار

آخشام سوروش اوندان: نه خبر وار کوچه‌لردن!

کبری‌‌نیوزون هر کوچه‌ده شعبه‌سی واردی

اونلا تره سئچ، آل صورا اخبار کوچه‌لردن!

قار یاغدی قرار کنسل اولوب، من باشی داشلی

ایندی ایکی گون‌دور کورورم قار کوچه‌لردن!

ای کاش قاییدام بیرده اوشاقلیق‌لارا بیرگون

غمسیز اوتورام بیرده ییغام شار کوچه‌لردن!