قلبیوی توتموش بئسوادلیق غمی

یوخدور ایشیق، تار گؤروسن عالمی

بو یارایا دینله دئییم مرهمی

علم قوی اولسون اوره گین همدمی

گئت ساواد اؤرگش مشه قوربان عمی!

*

یازقی باشارسان یازاسان نامه لر

بیر قلم آلتیندا گزه ر یوز شهر

دائیم اوشاقلاردان آلارسان خبر

شاد ائله سن ایرباهیمی-اکرمی

گئت ساواد اؤرگش مشه قوربان عمی!

*

سن ده ساواد اولسا اوخورسان کتاب

چوخلو سواللارا تاپارسان جاواب

اوندا بیلرسن نه دی علم حساب

اورگه شه سن تفریقی -ضربی- جَمی

گئت ساواد اؤرگش مشه قوربان عمی!

*

بو ساوادین فایداسی چوخدور هله

سن اوخو یاز مرحله به مرحله

چونکه باشاردین قلم آلدین اله

نامه یازیب شاد ائله جام جمی

گئت ساواد اؤرگش مشه قوربان عمی!

                                                         تقدیم اولوب رئیسه ی محترمه یه!

كلم شعري!
 
بايرام گونونده گلدي بيزيم ائمميزه كلم
تا تورشويا دؤنه، قوناق اولدي بيزه كلم

عشق اووچوسونی گورمه دیم آخیر تورا دوشدوم

هجران یوکو آلتیندا غریبه زورا دوشدوم

قورخوتموشودی عشق توروندان منی کونلوم

اوردان که بتر خوف ائله میشدیم  اورا دوشدوم

مجنون کیمی عشقین چولونه دوشمزیدیم من

اولده آغیل دان گئری گئتدیم صورا دوشدوم

وقتین ده منی ده رمه دی یار   سئوگی باغیندان

یا کیشمیشه دوندوم یا کی  موودن قورا دوشدوم!

اوردان بورا بوردان اورا گئتدیم دلی لیق ده

اوندان صورا بوردان اورا اوردان بورا دوشدوم

گاه سویله دی یار :دیپلوما گلمم گتی مدرک

هی تسته گیریشدیم صورا دا کنکورا دوشدوم

گئتدیم که بئشیک دن گوراچان علم آرایام من

دانشگاه آزاد دا بئشیک دن گورا دوشدوم

گوردوم گئجه طنز آغلیری ،سویلور که ازل ده-

پوشک آتدیلار آخیردا  سلیمانپورا دوشدوم!!

من نن اوقده ر آی باشی  پول چیخدی رئیسیم

یئخسین ائوین آللاه ، ائویمی یئخدی رئیسیم

پرونده مه توبیخ قالادی حق سیز- حساب سیز

دائم یاپیشیب خیرخیرامی سیخدی رئیسیم

نوبت یئتیشنده ائله  ویرنیخدی رئیسیم

دللک لیغه شایسته اولوب، تاپدی تخصص 

ارباب رجونی چون بیر عومور  قیخدی رئیسیم

رشوه آلاراق فوری چوبان دویمه یی توتدی

یاخدی چوره گه چای پولونی، تیخدی رئیسیم

گلدی که ایکی ائششگین آرپاسینی بولسون

بیر پای دا نهایت اؤزونه چیخـــــدی رئیسیم!!

ایشیق چیراقدان کؤچدو

گولوش دوداقدان کؤچدو

بولبول داها  گولمورو

"گول اوغلان" باغدان کؤچدو...

قوربانام سنده  بو قدر فهم و کمالاته اؤکوز

عاشیقم سنده اولان سئومه لی حالاته اؤکوز

گورمه دیم دیک باخاسان بیر اینکین قاش گؤزونه

سن نجابتده اینان زور گله سن آته اؤکوز

بئله سوزدورمه او آهو گوزویون قربان اولوم

سالما هی  اووچی لاری  فیکر و خیالاته اؤکوز

علم و دانش زمی سین دور گه  شوخوملا باشاباش

مدرک آل نطق ائله هی  باشلا افاضاته اؤکوز

دئدیلر یئر اؤکوز اوستونده  دئدیق البته

 نیازی یوخدوی بو فرضیه نین اثباته اؤکوز

پئیسرین قارنین اینان بتزیر عرب شیخلارینا

دئییره م ویزایین آل دور گئت اماراته اؤکوز

بو لیاقتله ریاستده اگر یوخدو گؤزون

کارمند اول دئییره م بعضی اداراته اؤکوز

چای پولو یونجا پولو وئردیله آت تئز کشووا

عاقل اول دقت ائله بعضی اشاراته اؤکوز 

دوزدو یئر برکدی ولی اینجیمه من نن گؤزلیم

آجی لیق سالما زهر قاتما بو اوقاته اؤکوز..

بايرام يئلـي به به گزيـــري  گوللــر ايچينده                  

گول عطري گلير  شور سالا  بولبوللر ايچينده

يار باغدا هورولموش ساچيني افشــان ائدرکن          

دوشدو باهارين عطـــــري  قرنفيللر ايچينده

هم يول چوخ اوزون هم گئجه دير آي داراق ال چک     

چوخ قورخورام آخير ايته سن تئللر ايچينده

عشق- عاشقي فعلا بو قدر بس دي غـــزل ده       

عشق- عاشقي دوشمــز يادا موشگوللر ايچينده

گئتدين بازارا هي باهــــــا قيمتلـــره باخما                    

يارانــــــه لري سيئر ائله  زنبيللر ايچينده

بايرامدا حقوقــــــون فيشيني بايدير آماندير                   

 شام اولسادا يانديرمـــــا شامي  يئللر ايچينده

اي واي گنه سؤز آزدي گئدير موشگوله ساري          

تعطيل ائله بو سؤزلــــــري تعطيل لر ايچينده

بايرام که گلير  مدرسه تعطيل دير اون اوچ گون        

 کئف سورمه غه باخ  ايندي  محصيللر ايچينده

به به تـــــازا ايل گلدي گوروشلر تازالاندي           

شادليق ساليري شـــــور گنه محفيللر ايچينده

بايرام گوروشونده نه گوزل سئشمه يه دوشدوم        

 بير پوسته تاپيلمير داهي آجيللــــــر ايچينده

اوغلوم بو قدر شربتيلن چـــــاي گئجه ايشمه           

 يوخسا قالاسان  ســـــارا کيمي سئللر ايچينده

پار-پاتلتيمه قوي هامي فاميل لوغـــــاز ائتسين      

چوخ گورمـــه لي دير بير دلي  عاقيللر ايچينده

هر يئرده قونــاق اولدوق اودا فوري سوخولدي        

بيلمم باجانـــــــاق نئينيري فاميللـــر ايچينده!

آرواد دئييری: بايرام اولــــــوب دفتري باغلا         

آز سئير ائلـــــــه مفعـــولُ مفاعيللر ايچينده

آلقیشلاییرام  ائل سؤزونـــو واردي  اومیدیم       

 آلقیشلایالار سؤزلــريمي  ائللـر ايچينده ...

آیاقیوا قویــــــــارام باش یا امام رضا(ع)                  منه نظر سالاسان  کاش یا امام رضا(ع)

گونش اوپور بو قیزیل گنبذی عجیب دویول               بو نوری گورمویه خفاش یا امام رضا(ع)

زیارتین ده منه  قسمت اولسا  قیمه خوروش          سنه نذیر دئمیشم  آش یا امام رضا(ع)

ژتون متون که یوخومدی مگر او خادمنن                 اولام یواشجانا  یولداش یا امام رضا(ع)

ضریحه چاتمیر الیم بیر نفر چیخیر بئلیمه                حاج اوغلی آز منه دیرماش یا امام رضا(ع)

فیکیر خیال باشیمین توکلرین توکوب گویا                 فلک آلیب اله ماققاش یا امام رضا(ع)

او قدر گوز یاشی توکدوم بو درد و غملریمه            اولوبدی گوزلریم آبپاش یا امام رضا(ع)

معاش یولوندا ایاقیم بئش اون قدم گئتمیش           ده ییر  چولاق قیچیما داش یا امام رضا(ع)

آی اورتاسیندا حقوق قورتولور، گوزوم آنجاق-         ایشیم  کیمی اولوری یاش یا امام رضا(ع)

بودا که جامعه میزدی گه گور که بئیمانلیق           توتوبدی شهری باشاباش یا امام رضا(ع)

کراک لا اکس ییخاندان جاوانلارین ائوینی                قویوبدی زه یئره خشخاش یا امام رضا(ع)

خیابان ایچره یاد اوغلان-قیز ال اله وئرمیش           گوره ن سانیر باجی-قارداش یا امام رضا(ع)

قدیم جوان  مد اوچون هی بوراردی بیغلارینی        بویونکی  آلدیریری  قاش یا امام رضا(ع)

گه گور بوگون نه یئییر لر کاسیبلارین حقین             بیر عده قلدر و کلاش یا امام رضا(ع)

خلاصه دوره دونوبدی نه خوش او شعرینده           دئییب دی شاعر  کفاش یا امام رضا(ع):

بو قدر اراذل و اوباش ایچینده، قوربان اولوم          "به فکر گنبد خود باش یا امام رضا(ع)"

سنی امام زمان بنده نی  شفاعت ائله                 او گون که سیرلار اولار فاش یا امام رضا(ع)

                                              کتده نه خبر؟!

مشه رحمان شهردن  قنبر عمی یه بئله یازیب:

قنبر عمی! احوالاتین نه جوردی؟                 بوغدالیغین ،دئمین، آتین نه جوردی؟

سویله گوروم عمی! کتده نه خبر؟               بیزیم قدیم ولایت ده نه خبر؟

قورد آتیلدی باشیمیزا بیر کـــره                     کندی اوتوردوق یومولدوق شهره

بیر شهر ده بلا گوردوق مین تهر                   زهر قاتیم سنه بلالی شهر

چوخلی زاماندی قالمیشام به خبر                قنبرعمی! کتدیلردن نه خبر؟

قارداشی یین اوشاقلاری نئجه دی؟               مش احمدین ایاقلاری نئجه دی؟

سویله گوروم اصلان دایی دیش قویوب؟        علی اکبرین قولاقلاری توختویوب

قتبرعمی! عاشق بولـود هاردادی                  کور اوغلو تک گوروم اوجالسین آدی

گاه چالاردی یانیق کرم، دیل قمی                نقل ائلردی بیزه اصلی کرمی

کندین قهوه سین ده چالاردی سازی            یئتیره ردی دالی سیجا آوازی

بیر ده گوروم کندین قیزلاری نئینیر؟               کندی میزین دادی- دوزلاری نئینیر؟

ائشیتمیشم اوزگه بیر حال تاپیبلار               شهرین مودلارین گویده قاپیبلار

سویله گوروم اوغلانلاردان نه خبر                 کتده ایگیت جاوانلاردان نه خبر؟

یالان دوغور گلیب چاتیب قولاغا                   کندین دبلرین قویوبلار قیراغا

خبرلری سویله باشلا سوزویون                   قاداسی نی آلیم ایکی گوزویون

قنبرعمی کند دن بئله جاواب یازیب:

آی مشدی!ال قویما اوره گیمه                     کول اله نیب باشیما دیله گیمه

آرزیلاریم گئدیب باد هاوایا                           ور ایشی میز آخیر چکدی هارایا

کنده گوزل گونلر ائیله دیم آرزی                    هئچ اولدی آرزیلار قالدیم تامارزی

سنون اوچون بیر خوش خبر قالمی ییب        کتده داهی سن گوره نلر قالمی ییب

اصلان دایی هله ده یوخدی دیشی              عوضینده قوروب دام اوسته دیشی

چیخالدیب دی دیشی قویوبدور داما              ماهوارایا باخیر صُب دن آخشاما

عل اکبرین قولاغلاری اولوب کار                    آمما کتده مسئول اولوب پستی وار

عاشق بولود سبکی ایندی پاپ اولوب          قهوه دن پاتوقی کافی شاپ اولوب

پاپاقین آتیبدی سیندیریب سازی                 دئییر : قووال نه دی ،گتیرین جازی

گیتار آلیبدی ســــــازینین یئرینه                   نریللیـــــری آوازی نین یئرینه!

داها قدیم ناقیللاردان اثـــر یوخ                     اصلی کرم دن سارادان خبر یوخ

گر خبر ایسته سن بویون سارادان                سراغینی توتگینــــان سینمادان

داها اوندان بیر سوز یوخدی ائلیم ده            ایندی گئدیب نقش اوینوری فیلیم ده

اوز گوزونی یئتدی قلم بزیری                       حیانی وئللی ییب ول ول گزیری

صحنه لری بسکه اوجور دولانیب                  سئلین ده اوندان اوره گی بولانیب

مفته ده وئرسه لر آپارمــاز اونی                   آخی نه جور تعریفاه سین ساز اونی

قیزلاردان سوروشدون آی مشه رحمان!           دردلریمی دئشمه من سنه قوربان

گووه لری دونوب اولوب دیک دابان                 مانتو گلیب ، گئدیبدی شلته تومان

ساچلارینی تئل تئل بویوللار مئشه              کلّه دئمه دئنن آل الوان مئشه!

مئش گلیبدی کتده حنــــا یئرینه                  حنا گئدیب تویدان صورا یئرینه

چیت گئدیبدی شالوار جنسی جین اولوب     کندین بوتون ملک لری جین اولوب

هیچ کیم قدیم لردن بیر سوز اوخومور           سودان گلن سورمه لی قیز اوخومور

سو شیرده دی سودان گلن هاردادی؟          سرمه هانی سرمه چکن هاردادی ؟

سرمه نه دی ، ایندی گلیبدی ای داد            کیپریگلره ریمل گوزلره میداد!

نئچه ایل دی کرشان دونوب پودورا                کتده هئچ کیم چپ باخمیری قوتورا

قیافه دن چیبزی چیبان قوتولوب                   اوز صافالیب چالا چوققور توتولوب

آتیبلار اننیکی تــوتـوبلار روژی                      آنجاق بیزه بسدی بو تکنولوژی!

قیزلار دائم بسله شیللر مد اوستـه            غیبت قازانین قویوللار اود اوسته

ترلان دئییر: مرجان باشین کوپ ائلیر             جیران دئییر: یوخ ای قیزا گوپ ائلیر

لیلا گئدیب آدین ائیلی ییب: لی لی         ایمبیل خالا اولوب :خاله امیلی!

رخشنده اوغلانلارینان چت ائلیر                   ننه سویمک عوضینه ات ائلیر!

آلتی آیدی عسگرین قیزی سارا                   مجوّزله کیلاس قویوب قیزلارا

اویناماق کیلاسی گونده اوچ ساعات           بورجوتماغا دئییر: موزون حرکات

اوغلاتلارین آی گلسین وای خبری                دردســــره سالیبلار کتدیلری

انودوبلار کتـــــده قدیم دبلری                       دوس توتوبلار سایتلاری وبلری

کامپیوتر ده ییشدیربدی کندی                     اورگه دیبدی بیر پارا تزه فندی

کد خدانین اوغلی آچیب کافی نت                ایشلری میز پیتداشیبدی گئت به گئت

ائولنمک یئرینه قیز دوستو تاپیر                   ائشیتمیشم عجایب ایشلر یاپیر

..........................................                  ...........................................

پنجره ساز قلی ده ییشیب تیپی                 نصب ائلیری ایندی ویندوز ایکس پی!

پینتی جامال اولوب پنتیوم جامال                 دینقیل احمد اولوب احمد دیجیتال

بو ادالار کندین ائوین ییخیبدی                     اکین بیچین داها یاددان چیخیبدی

ایندی جعفر ائوده سی دی رایت ائلیر           قربانعلی طراحی سایت ائلیر

ایش پیس یئره چکدی داها مشدی              بیزیم کی قالدی آللها مشدی...